ანაკლიაში „მომავლის ბანაკს“ უკრაინელი მოზარდები სტუმრობენ

საქართველოს მთავრობის დადგენილებით, საქართველოს სპორტისა და ახალგაზრდობის საქმეთა სამინისტრომ და მის დაქვემდებარებაში არსებულმა ბავშვთა და ახალგაზრდობის ეროვნულმა ცენტრმა უკრაინის აღმოსავლეთ რეგიონებში სამხედრო მოქმედებებისა და აგრესიის შედეგად დაზარალებული უკრაინელი ახალგაზრდები „მომავლის ბანაკში“ ჩამოიყვანეს.
უკრაინელი მოზარდების დახვედრის საზეიმო ცერემონია ანაკლიაში წუხელ გვიან ღამით გაიმართა. ახალგაზრდები ზუგდიდის მუნიციპალიტეტის გამგეობისა და საკრებულოს წევრებმა მოინახულეს. პროგრამაში მონაწილეობას 14-დან 18-წლამდე ასაკის 115 მოზარდი მიიღებს მონაწილეობას.
„ბავშვთა და ახალგაზრდობის ეროვნული ცენტრის“ მიერ ახალგაზრდებისათვის შემუშავდა სპეციალური პროგრამა, რომელიც მიზნად ისახავს სამხედრო მოქმედებებისა და აგრესიის შედეგად დაზარალებული ბავშვების რებილიტაციასა და ცხოვრების ჩვეულ რეჟიმში დაბრუნების ხელშეწყობას. პროგრამა დატვირთულია როგორც გასართობი, ასევე შემეცნებითი აქტივობებით. უკრაინელი ახალგაზრდები ჩაერთვებიან სპორტულ აქტივობებში-ფეხბურთი, კალათბურთი, ფრენბურთი, ჭადრაკი, მაგიდის ჩოგბურთი. მონაწილეობას მიიღებენ კინოჩვენებებსა და ინტელექტუალურ თამაშებში. გაერთობიან ანაკლიის აკვაპარკში. იმოგზაურებენ მარტვილის კანიონში. მოინახულებენ დადიანების სასახლეს. ახალგაზრდების ყველა ხარჯს ქართული მხარე დაფარავს.