სამეგრელო-ზემო სვანეთი მდებარეობს საქართველოს ცენტრალურ ჩრდილო-დასავლეთ ნაწილში. დასავლეთიდან მას ესაზღვრება შავი ზღვა; ჩრდილო-დასავლეთიდან – აფხაზეთი, რომელთანაც საზღვარი მდინარე ენგურზე და კოდორის ქედზე გადის; ჩრდილოეთიდან – რუსეთის ფედერაციის სუბიექტები (ყარაჩაი-ჩერქეზეთი, ყაბარდო-ბალყარეთი), რომელთაგანაც კავკასიონის მთავარი წყალგამყოფი ქედით არის გამოყოფილი; ჩრდილო-აღმოსავლეთიდან და აღმოსავლეთიდან – რაჭა-ლეჩხუმ-ქვემო სვანეთის რეგიონი, რომლებთანაც საზღვარი სვანეთისა და ეგრისის ქედებზე და ასხის მასივზე გადის; სამხრეთ-აღმოსავლეთიდან – იმერეთის რეგიონი; სამხრეთიდან – გურიის რეგიონი.

სამეგრელო-ზემო სვანეთის ტერიტორია ქვეყნის ტერიტორიის 10.8 %-ია, რაც შეადგენს 7.4 ათას კვ. კმ-ს. ამ მონაცემით მას მეორე ადგილი უკავია საქართველოს რეგიონებს შორის.

რეგიონის მთლიანი ფართობის 40.7%, ანუ 3.01 ათასი კვ. კმ. უკავიათ ტყეებს.

ზემო სვანეთი საქართველოს ჰიფსომეტრიულ „ჭერად“ ითვლება. მისი ტერიტორიის 96% ზღვის დონიდან 1000 მ-ზე, ხოლო 65.8 % – 2000 მ-ზე მაღლა არის განლაგებული.

ზომიერი კლიმატი, ბუნებრივი სილამაზე და დაცული ფაუნა რეგიონში ზამთრისა და ზაფხულის ტურიზმის განვითარების საშუალებას იძლევა.