ზუგდიდში სრულად რეაბილიტირებული საბავშვო ბაღი გაიხსნა, რომელიც 100 აღსაზრდელზეა გათვლილი. საბავშვო ბაღი ადგილობრივებთან ერთად თაბუკაშვილის ქუჩაზე მდებარე ახალ ჩასახლებაში მცხოვრები დევნილი ოჯახების პატარებსაც მოემსახურება, აქამდე მათ ბავშვების ტარება მოშორებით მდებარე საბავშვო ბაღებში უწევდათ.

 

#13 საბავშვო ბაღის რეაბილიტაცია ადგილობრივი ბიუჯეტიდან დაფინანსდა და მის სარემონტო სამუშაოებზე 150 ათასამდე ლარი დაიხარჯა. საბავშვო ბაღი აღიჭურვა ახალი ინვენტარით, ახალი ტექნიკა გადაეცა სამზარეულოსაც, ასევე კეთილმოეწყო საბავშვო ბაღის ეზო.

 

საბავშვო ბაღის გახსნას დღეს სამეგრელო-ზემო სვანეთის გუბერნატორის მოადგილე კობა ქანთარია, ქალაქ ზუგდიდის მერი ირაკლი გოგოხია, საკრებულოს თავმჯდომარე მერაბ ქვარაია და ადგილობრივი ხელისუფლების სხვა წარმოამდგენლები დაესწრნენ.