ზუგდიდში დადიანების ჯვარედინა სასახლე აღმოაჩინეს

ზუგდიდის ბოტანიკურ ბაღში დადიანების ჯვარედინა სასახლის საძირკველი, იატაკი, ბუხრები, კარის თაღი და სხვადასხვა ფრაგმენტები აღმოაჩინეს. სასახლე მარი ბროსეს მემუარებში აქვს აღწერილი, თუმცა მისი ადგილმდებარეობის შესახებ აქამდე უცნობი იყო. არქეოლოგ რევაზ პაპუაშვილის ცნობით, სასახლის პარამეტრები და მისი მოყვანილობა სრულად ემთხვევა მარი ბროსეს აღწერას, რომელმაც აქ დადიანებთან ერთად აღდგომის ღამე გაათენა. ბროსეს ცნობით, სასახლის ცენტრში დიდი, 32 ადგილიანი მაგიდა იდგა, ამ სასახლეს კი დადიანები  საბანკეტოდ იყენებდნენ. 

გათხრები ასევე მიმდინარეობს ბოტანიკური ბაღის შესასვლელთან, სადაც არქეოლოგებმა დადიანების კიდევ ერთი სასახლის ნაშთს მიაკვლიეს. სასახლის სიგრძე 100 მეტრამდეა და არქეოლოგების ცნობით ის მეცხრამეტე საუკუნეში გადაიწვა.

აღმოჩენის ადგილებიკულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ანთიძემ, სამეგრელო-ზემო სვანეთის ვიცე-გუბერნატორმა კობა ქანთარიამ და ზუგდიდის ქალაქმშენებლობის სამსახურის უფროსმა ბადრი მესხმა დაათვალიერეს. 

ნიკოლოზ ანთიძის განცხადებით, აღმოჩენა ზუგდიდის ბოტანიკური ბაღის რეაბილიტაციის პროექტში ცვლილებებს გამოიწვევს. განხილვის საგანი გახდება, თუ რა სახით მოხდება ორი ახალი აღმოჩენის ტურისტულ სივრცეში მოქცევა, ერთ-ერთ ვარიანტად აღმოჩენების შემინვა განიხილება, რომელიც ძეგლებს დაზიანებისგანაც დაიცავს. ბოტანიკური ბაღის რეაბილიტაცია 2016 წელს დაიწყება.