დასავლეთ საქართველოში მერძევეობის ფერმა და რძის გადამამუშავებელი საწარმო აშენდება

2014 წლის 16 ივლისს, აბაშის მუნიციპალიტეტში, საქართველოს თანაინვესტირების ფონდის სოფლის მეურნეობის საინვესტიციო მიმართულების პროექტის ხელმძღვანელმა, რატი მექვაბიშვილმა ფონდის პარტნიორი კომპანია „ფრიჟენის“ (“Friesian”) მეცხოველეობის ექსპერტ ბერენდ დე ლეუსთან ერთად შეხვედრა გამართა ადგილობრივ მოსახლეობასთან.

შეხვედრის ფარგლებში პროექტის ხელმძღვანელმა და ჰოლანდიელმა ექსპერტმა ადგილობრივ მოსახლეობას წარუდგინეს ერთობლივი პროექტი, რომელიც მიზნად ისახავს დასავლეთ საქართველოში 1000 სულიანი მერძევეობის ფერმის და რძის გადამამუშვებელი საწარმოს მშენებლობას (სიმძლავრე: 100 ტ რძე დღეში).

პროექტის მინიმალური ჯამური საინვესტიციო ღირებულება 27 მლნ ლარს შეადგენს. ადგილობრივად დასაქმებულთა რიცხვი კი მინიმუმ 150 ადამიანს გაუტოლდება.

პროექტის ფარგლებში რძის გადამამუშავებელი საწარმო ადგილობრივი ფერმერებისგან შეისყიდის რძეს, რის შედეგადაც ჯამში ფერმერები ყოველდღიურად მიიღებენ მინიმუმ 60,000 ლარის ღირებულების შემოსავალს.

მატერიალურ შემოსავალზე დამატებით, ფერმერებისთვის ხელმისაწვდომი იქნება უფასო ტექნიკური და საკონსულტაციო მხარაჭერა ფერმების მართვის, ვეტერინარიისა, პირუტყვის მოვლისა და კვების თვალსაზრისით.

დამატებით, მერძევეობის ფერმის კომპლექსის ფარგლებში იფუნქციონირებს ტრენინგ ცენტრი, რომელიც დაინტერესებული ადგილობრივი ფერმერებისთვის გამართავს თეორიული და პრაქტიკული ხასიათის ტრენინგებს მეცხოველეობის თემასთან დაკავშირებით.

აღნიშნულ პროექტს ასევე გააჩნია სოციალური პაკეტი, რომელიც მერძევეობის ფერმის მიმდებარედ არსებული სოფლის მოსახლეობისათვის საბავშვო ბაღის (50-60 ბავშვზე) აშენებას გულისხმობს.