ვიცე-გუბერნატორმა აქციის მონაწილეს ბინის ქირაობა და სამედიცინო დახმარების მიღება შესთავაზა

ზუგდიდის მუნიციპალიტეტის გამგეობის შენობის მიმდებარედმწოლიარე აქციის მონაწილე ციალა ჯოჯუასთან სამეგრელო-ზემო სვანეთის ვიცე-გუბერნატორი, ადგილობრივი ხელისუფლების და სოციალური მომსახურების სააგენტოს წარმომადგენლები მივედნენ. კობა ქანთარიამ ჯანმრთელობის მდგომარეობით დაინტერესდა და კერძო დავის მოგვარებამდე ქალბატონს ქირით გადასვლა და სამედიცინო დახმარება კიდევ ერთხელ შესთავაზა. მისივე განცხადებით, ის პრეტენზია, რაც ჯოჯუებს აქვთ სასამართლოს გადასაწყვეტია და ხელისიუფლების კომპეტენციაში არ შედის.

„ჩვენი არაერთი თხოვნის და შეთავაზების მიუხედავად ქალბატონი უარს აცხადებს სამედიცინო დახმარებაზე, ადგილობრივი თვითმმართველობა მას ბინის ქირავნობის პროგრამაში ჩართვას, ასევე იმ საცხოვრებლის გარემონტებას სთავაზობს, სადაც ამჟამად ცხოვრობენ, თუმცა ქალბატონი ციალა და მისი შვილი უარს აცხადებენ დახმარების მიღებაზე, ის დავა კი რაც კერძო სუბიექტებს შორის მიმდინარეობს არის სასამართლოში გასარკვევი და ჩვენს კომპეტენციას სცილდება“ - აცხადებს კობა ქანთარია.

ციალა ჯოჯუას სამედიცინო დახმარება და დავის დასრულებამდე ბინის დაქირავება ადგილობრივმა ხელისუფლებამ, აქციის დაწყების დღიდან  არაერთხელ შესთავაზა.