ფოთში რეაბილიტირებული საჭადრაკო სკოლის სატურნირო დარბაზი გაიხსნა

ფოთის, ნანა ალექსანდრიას სახელობის ჭადრაკის და შაშის სპორტსკოლის სატურნო დარბაზს სრული რეაბილიტაცია ჩაუტარდა. დარბაზი უზრუნველყოფილია თანამედროვე საჭადრაკო ინვენტარითა და აპარატურით, რაც იძლევა უმაღლესი დონის ტურნირების გამართვის საშუალებას. დღეისათვის ევროპული დონის სატურნირო დარბაზი მასპინძლობს სხვადასხვა საერთაშორისო ტურნირებს. დარბაზში არსებული თანამედროვე აპარატურა კი იძლევა იმის საშუალებას, რომ განხორციელდეს საჭადრაკო პარტიების ონლაინ ტრანსლირება. ასევე, სკოლის მოსწავლეებისათვის, სხვადასხვა დიდოსტატების მიერ ტარდება ონლაინ გაკვეთილები. დამონტაჟებული ეკრანის საშუალებით შესაძლებელია დარბაზში მყოფებმა თვალი ადევნონ არსებულ საჭადრაკო ტელევიზიას. სამშენებლო სამუშაოები და ინვენტარის შეძენა განხორციელდა ფოთის თვითმმართველობის მიერ ადგილობრივი ბიუჯეტიდან გამოყოფილი თანხებით, რომლის რაოდენობამ 40000 ლარი შეადგინა.