ხობში საფესტივალო სამზადისს გუბერნატორი გაეცნო

ხობის VII საერთაშორისო ფესტივალის „სიმღერა სამეგრელოზე“ მოსამზადებელი სამუშაოების აქტიურად მიმდინარეობს.

დღეს, ხობის მუნიციპალიტეტის გამგეობის სააქტო დარბაზში ფესტივალის საორგანიზაციო ჯგუფის მუშა შეხვედრა გაიმართა. შეხვედრაზე სახელმწიფო რწმუნებულმა - გუბერნატორმა ლევან შონიამ, მაჟორიტარმა დეპუტატმა გოდერძი ბუკიამ, ხობის მუნიციპალიტეტის გამგებელმა გოჩა ქაჯაიამ, სახელმწიფო რწმუნებულის - გუბერნატორის აპარატის უფროსმა ლაშა გვასალიამ და საქართველოს ხელოვნების დამსახურებულმა მოღვაწემ, ხობის საპატიო მოქალაქემ ანზორ ერქომაიშვილმა ფესტივალის მნიშვნელობაზე, მიზნებზე და განსახორციელებელ სამუშაოებზეისაუბრეს. შეხვედრას ასევე ესწრებოდნენ ხობის მუნიციპალიტეტის საკრებულოს თავმჯდომარე ედიშერ ჯობავა, ფესტივალის დირექტორი რევაზ წულაია დასაორგანიზაციო ჯგუფის წევრები.

მეშვიდე საერთაშორისო ფესტივალი ხობში მიმდინარე წლის  2-3 ოქტომბერს გაიმართება  და მომღერალ თამარ გვერდწითელსა და ანსამბლ „რუსთავის“ შემოქმედებას მიეძღვნება. ფესტივალში საქართველოს ყველა კუთხის მომღერალთა გუნდები მიიღებენ მონაწილეობას.

ფესტივალის ორგანიზატორები და მხარდამჭერები არიან განათლების, კულტურისა და სულიერების აღორძინების საერთაშორისო ფონდი „ხობი“, ქართული საერთაშორისო სიმღერის საერთაშორისო ცენტრი, საქართველოს კულტურისა და ძეგლთა დაცვის სამინისტრო, სახელმწიფო რწმუნებულის - გუბერნატორის ადმინისტრაცია, ხობის მუნიციპალიტეტის გამგეობა და საკრებულო. 

შეხვედრამდე სტუმრებმა დაათვალიერეს: ხობის მუნიციპალიტეტისთვის სახელმწიფოს მხრიდან საკუთრებაში გადმოცემული ყოფილი კინოთეატრის „თუთარჩელას“ შენობა, სადაც სპორტული კომპლექსის მოწყობაა დაგეგმილი, მშენებარე სიმინდის ზეთისა და კომბინირებული საკვების გადამამუშავებელი ქარხნები, ასევე - საფესტივალოდ გათვალისწინებული საზოგადოებრივი თავშეყრის ადგილები: ხობის კულტურის სახლისა და ცენტრალური სტადიონის მიმდებარე ტერიტორიები და ხეთის თეატრონი.