დავით ვერავამ ენერგეტიკის სასწავლო ცენტრის პროექტის გამარჯვებულები დააჯილდოვა

სემეკის მიერ დაფუძნებული ენერგეტიკის სასწავლო ცენტრის პროექტის - „ელექტროენერგიის გზა დაბადებიდან ჩვენამდე“ ფარგლებში სენაკისა და ხობის საჯარო სკოლების მოსწავლეების მიერ ენერგეტიკის თემატიკაზე შექმნილი ნამუშევრების გამოფენა გაიმართა.  გამოვლინდნენ გამარჯვებულები, რომელთაც  პორტატული და პლანშეტური კომპიუტერები გადაეცათ.

დაჯილდოების ღონისძიება სენაკში, ტექნოპარკში გაიმართა, სადაც სამეგრელო-ზემო სვანეთის სახელმწიფო რწმუნებულმა დავით ვერავამ, სემეკის თავმჯდომარე დავით ნარმანიამ, სენაკის მერმა ვახტანგ გადელიამ, სენაკის საკრებულოს თავმჯდომარე ჯუმბერ ტყებუჩავამ  გამარჯვებულ მოსწავლეებს სერტიფიკატები და საჩუქრები გადასცეს.

ენერგეტიკის სასწავლო ცენტრის მიერ სკოლის მოსწავლეებისათვის პროექტი - „ელექტროენერგიის გზა დაბადებიდან ჩვენამდე“ უკვე მესამედ განხორციელდა. პროექტის მიზანია ელექტროენერგიის წარმოებიდან მოხმარებამდე სრული ციკლის შესახებ სკოლის მოსწავლეების ინფორმირება, განახლებადი ენერგიების, საქართველოს მწვანე ენერგეტიკული პოტენციალის შესახებ მათი ცნობიერების დონის ამაღლება. პროექტის ფარგლებში მონაწილეებს ჩაუტარდათ ტრენინგები, მოეწყო მოსწავლეების მიერ შექმნილი თემატური ნამუშევრების გამოფენა და გამარჯვებული მოსწავლეებისთვის ერთკვირიანი საზაფხულო სკოლა გაიმართა.