ინფრასტრუქტურის მინისტრი და სახელმწიფო რწმუნებული მესტიის ცენტრალური გზის რეაბილიტაციის სამუშაოებს გაეცნენ

ინფრასტრუქტურის მინისტრი, რევაზ სოხაძე, ზემო სვანეთში იმყოფება, სადაც ინფრასტრუქტურული პროექტების მიმდინარეობას, შედეგებსა და გამოწვევებს, სამეგრელო-ზემო სვანეთის სახელმწიფო რწმუნებულთან დავით ვერავასთან, საქართველოს პარლამენტის წევრებთან – სოზარ სუბართან და ვიქტორ ჯაფარიძესთან, ასევე, ადგილობრივი ხელისუფლების წარმომადგენლებთან ერთად, ადგილზე ეცნობა.

ამ ეტაპზე, ზუგდიდი-ჯვარი-მესტია-ლასდილის საავტომობილო გზის ზუგდიდი-მესტიის დამაკავშირებელი მონაკვეთის რეაბილიტაცია აქტიურად მიმდინარეობს. სამუშაოები ორ პროექტშია გაერთიანებული და ჯამში 20.5 კმ-იან (კმ 81-94 და კმ 97-110) მონაკვეთს მოიცავს.

მიმდინარე სამუშაოების ფარგლებში ხორციელდება: ასფალტ-ბეტონის საფარის მოწყობა, ზედა და ქვედა საყრდენი კედლების მშენებლობა, ეზოებში შესასვლელების და მიერთებების და ავტობუსის გაჩერებების მოწყობა, 7 არსებული ხიდის რეაბილიტაცია, კიუვეტებისა და ხელოვნური ნაგებობების შეკეთება და განახლება, ახალი ინფრასტრუქტურის მოწყობა (მათ შორის, საგზაო ნიშნები და გზის მონიშვნა), რაც უზრუნველყოფს გადაადგილების უსაფრთხოებას როგორც მძღოლებისთვის, ისე ქვეითებისთვის.

პროექტი მნიშვნელოვნად გააუმჯობესებს მესტიისკენ მიმავალ მთავარ გზაზე მოძრაობის ხარისხს.

პროექტის ჯამური ღირებულება 43.6 მილიონი ლარია და იგი მთლიანად სახელმწიფო ბიუჯეტიდან ფინანსდება.