ახალი ამბები
მთავრობის ადმინისტრაციის წარმომადგენლების სამუშაო ვიზიტი მესტიაში
ინფრასტრუქტურული პროექტების მიმდინარეობის მონიტორინგის მიზნით, 6 ივლისს, მესტიის მუნიციპალიტეტს სამუშაო ვიზიტით ეწვია საქართველოს მთავრობის ადმინისტრაციის რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის უფროსი - გიორგი ამაშუკელი, ამავე დეპარტამენტის კოორდინაციის სამსახურის უფროსი - გიორგი როინიშვილი და სამეგრელო – ზემო სვანეთის გუბერნატორი - ლევან შონია. ასევე ჭუბერში იმყოფებოდა საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი - სოზარ სუბარი.
სტუმრებმა მესტიის მუნიციპალიტეტის გამგებელთან, კაპიტონ ჟორჟოლიანთან ერთად, ადგილზე მოინახულეს სოფელ ლახამში, სტიქიის შედეგად დაზიანებული საავტომობილო გზა. ასევე დაათვალიერეს იმ მოსახლის საკარმიდამო ტერიტორია, რომელსაც მდინარე ნენსკრა ადიდების შედეგად უქმნის საფრთხეს. აღნიშნეს მდგომარეობის სირთულე და დასახეს პირველ რიგში გასატარებელი აუცილებელი ღონისძიებები. ასევე იმსჯელეს, პრობლემის აღმოსაფხვრელად საჭირო ძირითადი ღონისძიებების განსახორციელებლად საჭირო თანხების მოძიების გზებზე.
დღეს, 7 ივლისს, სტუმრები თეთნულდის სათხილამურო კურორტის მშენებლობასა და დაბა მესტიაში მიმდინარე ინფრასტრუქტურული პროექტების სამშენებლო სამუშაოებს დაათვალიერებენ. ასევე გაიმართება სამუშაო თათბირი.
