ავტობუსების შესყიდვა საქართველოს ურბანული ტრანსპორტის განვითარების პროგრამის ფარგლებში ხორციელდება. პროგრამა ევროპის რეკონსტრუქციისა და განვითარების ბანკის (EBRD) ფინანსური მხარდაჭერით ხორციელდება და კონტრაქტის საერთო ღირებულება 18.7 მილიონ ევროს შეადგენს.

 

ახალი ავტობუსები სამეგრელო-ზემო სვანეთის სახელმწიფო რწმუნებულის მოვალეობის შემსრულებელმა მალხაზ თორიამ, მუნიციპალური განვითარების ფონდის დირექტორმა, ზუგდიდის მაჟორიტარმა დეპუტატმა, მერმა და საკრებულოს თავმჯდომარემ დაათვალიერეს.

 

,,კორონავირუსის გამო არსებული შეზღუდვების დასრულებისთანავე ეს ავტობუსები მოემსახურება ზუგდიდის მუნიციპალიტეტში მცხოვრებ მოსახლეობას, რაც მათი კომფორტული მგზავრობისა და გადაადგილებისთვის მნიშვნელოვანია. ასევე მნიშვნელოვანი, რომ მუნიციპალური ავტოპარკის განახლების პროცესი ზუგდიდში ჩვენ გასულ წელს დავიწყეთ და 15 ახალი ავტობუსი შევიძინეთ, ჯამში კი ზუგდიდს 40 ახალი, თანამედროვე ავტობუსი ეყოლება. ასევე მნიშვნელოვანია, რომ ზუგდიდის ექნება ავტობუსების მომსახურეობისთვის ახალი ავტოპარკი, რომლის სამშენებლო სამუშაოებიც ინტენსიურად მიმდინარეობს” - განაცხადა მალხაზ თორიამ.

სატრანსპორტო საშუალებები სრულად ადაპტირებულია შეზღუდული შესაძლებლობების მქონე პირებისთვის. ახალი ავტობუსები 8.5 მეტრიანია და გათვლილია 50 მგზავრზე.

 

175 ავტობუსი სხვადასხვა მუნიციპალიტეტს მომდევნო წლის გაზაფხულამდე ეტაპობრივად გადაეცემა. ახალი ავტობუსების მარშრუტებსა და სატრანსპორტო დერეფნებს მუნიციპალიტეტები განსაზღვრავენ.