რუხის საავადმყოფო კომპლექსის 12-ვე კორპუსი ერთდროულად შენდება

ზუგდიდის მუნიციპალიტეტის კონფლიქტისპირა სოფელ რუხში 220-ადგილიანი მრავალპროფილიანი საუნივერსიტეტო კლინიკა შენდება. კომპლექსი რამდენიმე ობიექტისგან შედეგება: ძირითად სტაციონარულ კორპუსში 7 ბლოკი შედის, ცალკეა პათოლოგ-ანატომიის, კვებისა და ცენტრალური სამრეცხაო-სასტერილიზაციო კორპუსები, ცალკე - საგენერატორო და საქვაბე ნაგებობები. ამ ბლოკებიდან ნაწილი 5, ნაწილი კი - 2-სართულიანი იქნება.

კლინიკის ტერიტორიაზე, მოეწყობა, ასევე, აუდიტორიები და ბიბლიოთეკა, სადაც სამედიცინო პროფილის სტუდენტები და რეზიდენტები კვალიფიკაციის ამაღლებას შეძლებენ.  რეზიდენტების, კლინიკაში სამკურნალოდ ჩამოყვანილი პაციენტების ოჯახის წევრებისა და ახლობლებისთვის დაგეგმილია საერთო საცხოვრებლის მშენებლობა. აქვე მოეწყობა სპორტულ-გამაჯანსაღებელი ინფრასტრუქტურა, ავტოსადგომები, შიდა სავალი გზები, წყლის აუზები და სკვერები.

სამუშაოები წარმოებს სამშენებლო უსაფრთხოების წესების, გარემოსდაცვითი და სეისმური მოთხოვნების სრული დაცვით. მშენებლობაზე 145 ადამიანია დასაქმებული, მათი 85% ადგილობრივი მცხოვრებია. მშენებლობის დასრულების შემდეგ, სამედიცინო დაწესებულებაში, ტექნიკური და დამხმარე პერსონალის ჩათვლით, 600-მდე ადამიანი იმუშავებს.
საუნივერსიტეტო კლინიკის მშენებლობა 41 მილიონ 264 ათასი ლარი ჯდება და მისი დასრულება 30 თვეში განისაზღვრა. სამუშაოებს სახელმწიფო ბიუჯეტი აფინანსებს. მშენებლობას შ.პ.ს. „სახელმწიფო სამშენებლო კომპანია" ახორციელებს.

ახალ საავადმყოფოს რეგიონული დატვირთვა ექნება და სამეგრელო-ზემო სვანეთის მოსახლეობას, ასევე, აფხაზეთის ტერიტორიაზე მცხოვრებ პაციენტებს მოემსახურება.