სამაშველო სამუშაოები მარტვილში

მარტვილის მუნიციპალიტეტში ძლიერმა წვიმებმა გამოიწვია მდინარე ,,აბაშის,, ადიდება, ამ დროს გაჭედილის კანიონში 16 მოსწავლე იმყოფებოდა.
ბავშვები მარტვილში ექსკურსიაზე რუსთავის ერთ-ერთი სკოლიდან ჰყავდათ წაყვანილი, მოსწავლეები გაჭედილის კანიონს ათვალიერებდნენ, როდესაც მოულოდნელად მდინარე ადიდდა.
სამაშველო სამუშაოები ჩატარდა სამეგრელო -ზემო სვანეთში სახელმწიფო რწმუნებულის–გუბერნატორის ადმინისტრაციის საგანგებო სიტუაციების მართვის სამსახურის მიერ, ასევე სამუშაოებში მონაწილეობა მიიღო მარტვილის, ზუგდიდის, ჩხოროწყუს, სენაკის და წალენჯიხის სახანძრო–სამაშველო სამსახურებმა. სამეგრელო ზემო სვანეთში სახელმწიფო რწმუნებულის–გუბერნატორის პირველმა მოადგილემ კობა ქანთარიამ მადლობა გადაუხადა სამაშველო ღონისძიების მონაწილეებს გაწეული თავდადებისთვის.

მარტვილის მუნიციპალიტეტის სოფელ გაჭედილში ძლიერი წვიმის შედეგად, რომელსაც წინ სეტყვა უძღოდა, ადგილობრივი მოსახლეობის სახლები და ეზოები დატბორა, განადგურებულია სახნავ–სათესი მიწები, დაზიანდა შიდა სასოფლო გზები, ხიდები და წყალსაწრეტი არხები. სიტუაციის შესასწავლად მარტვილის მუნიციპალიტეტის გამგეობაში შექმნილია სპეციალური კომისია და მოხდება დეტალურად ზარალის აღწერა.