პრემიერ მინისტრმა სამეგრელოში თხილის ქარხანა დაათვალიერა და სურსათის უვნებლობის სააგენტო გახსნა

საქართველოს პრემიერ-მინისტრი, სოფლის მეურნეობის მინისტრთან და სამეგრელო-ზემო სვანეთის გუბერნატორთან ერთად ხობში შპს “ჯორჯიან პროდაქტს რენესანსის” მიერ დაფუძნებულ თხილის ქარხანას ესტუმრა. ქარხანა 2013 წელს აშენდა და მასში 300 000 აშშ დოლარის ქართული ინვესტიცია განხორციელდა, სოფლის მეურნეობის პროექტების მართვის სააგენტოს სოფლის მეურნეობის გადამამუშავებელი საწარმოების თანადაფინანსების პროექტში კი მოიპოვა 782 000 აშშ დოლარის ოდენობის დაფინანსება. ქარხანა აწარმოებს თხილის გულს, მოხალულ თხილს, ბლანშირებულ თხილს და აგრეთვე ინოვაციურ თხილის პროდუქტს-მოხალულ, დამარილებულ თხილს ნაჭუჭით. პროექტის ფარგლებში საწარმომ შეძლო შეესყიდა თანამედროვე, უახლესი მოსახალი და შესაფუთი მანქანა-დანადგარები, ძირითადი საჭირო, საწარმოო აღჭურვილობები და ნედლეული.

ხობის შემდეგ საქართველოს პრემიერ-მინისტრმა ზუგდიდში სოფლის მეურნეობის სამინისტროს სურსათის უვნებლობის ეროვნული სააგენტოს ახალი ოფისი გახსნა. თანამედროვე სტანდარტების, უახლოესი ტექნიკით აღჭურვილი ოფისის გახსნას სოფლის მეურნეობის მინისტრი ოთარ დანელია, სურსათის ეროვნული სააგენტოს უფროსი ზაზა დოლიძე და ადგილობრივი ხელისუფლების წარმომადგენლები დაესწრნენ. რეგიონულ სამმართველოში სულ 35 ადამიანია დასაქმებული, სურსათის ეროვნული სააგენტოს ახალ ოფისში კი 12 ადგილობრივი დასაქმდება. რეგიონული სამსახური უზრუნველყოფს მავნე სურსათის გამოვლენასა და განადგურებას, ცხოველთა ჯანმრთელობის დაცვას და ეპიდაფეთქებების ლიკვიდაციას, სასოფლო-სამეურნეო კულტურების დაცვას მავნე ორგანიზმებისაგან. ახალი შენობა ზუგდიდში აგრარული სექტორის ყოვლისმომცველი განვითარების ფონდის დაფინანსებით აშენდა. სურსათის ეროვნულ სააგენტოს ქვეყნის მასშტაბით უკვე აქვს 5 ახალი ოფისი. წლის ბოლომდე კიდევ 3 ახალი ოფისის გახსნა იგეგმება.