სპორტის მინისტრმა ფოთში რაგბის და ფეხბურთის მშენებარე სტადიონები დაათვალიერა

სპორტისა და ახალგაზრდობის საქმეთა მინისტრმა ლევან ყიფიანმა, სამეგრელო-ზემო სვენთის მხარეში სახელმწიფო რწმუნებულის პირველმა მოადგილემ კობა ქანთარიამ, ფოთის მერმა ირაკლი კაკულიამ და ადგილობრივი ხელისუფლების წარმომადგენლებმა ფოთში რაგბისა და ფეხბურთის ცენტრალური სტადიონების სამშენებლო სამუშაოები დაათვალიერეს.

რაგბის სტადიონის მშენებლობა ქალაქ ფოთში 2012 წელს დაიწყო და მიმდინარე წლის აპრილში დასრულდება. ფოთში რაგბის სტადიონი "ქართუ ჯგუფის" ფინანსური ხელშეწყობით ჯომპანია "ატუს" მიერ შენდება, პროექტის ღირებულება 4 მილიონ ლარამდეა. თანამედროვე რაგბის სტადიონს ბუნებრივი და ხელოვნურსაფარიანი მოედნები აქვს და 2 500 მაყურებელზეა გათვლილი.

რაგბის სტადიონის დათვალიერების შემდეგ ლევან ყიფიანმა, კობა ქანთარიამ და ირაკლი კაკულიამ ფოთში, ცენტრალური საფეხბურთო სტადიონის მშენებლობაც დაათვალიერეს. სტადიონზე დასავლეთ ტრიბუნის მშენებლობა მიმდინარე წლის ივნისში დასრულდება. სამშენებლო სამუშაოებს შპს „ხიდი“ ახორციელებს. მოედნების დათვალიერების შემდეგ სპორტის მინისტრი ფეხბურთელებსა და რაგბისტებს შეხვდა და მათგან არსებულ პრობლემებსა და საჭიროებეზე ინფორმაცია მიიღო.