2 460 დევნილი ოჯახისთვის ზუგდიდში საცხოვრებელი კორპუსები აშენდება

2 460 დევნილი ოჯახისთვის ზუგდიდში, ბარამიას ქუჩაზე საცხოვრებელი კორპუსები აშენდება. ინფორმაცია დევნილებს ბარამიას ქუჩაზევე გააცნეს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა, სამეგრელო-ზემო სვანეთის მხარეში სახელმწიფო რწმუნებულმა ლევან შონიამ და აფხაზეთის მთავრობის თავმჯდომარემ ვახტანგ ყოლბაიამ.

მინისტრმა დევნილებს განუცხადა, რომ უახლოეს მომავალში ბარამიას ქუჩაზე 34 თორმეტსართულიანი კორპუსების მშენებლობა დაიწყება, სადაც დევნილი ოჯახი ბინას საკუთრებაში მიიღებენ.

მინისტრისვე განცხადებით, განაშენიანება 3,5 ჰექტარზე დაიწყება, კორპუსებთან ერთად მოეწყობა ინფრასტრუქტურა და დევნილებს ყველა სერვისით აღჭურვილი თანამედროვე საცხოვრებელი უბანი ექნებათ.

პროექტს დევნილებისთვის უმნიშვნელოვანესი უწოდა მხარის გუბერნატორმა ლევან შონიამ, რომელმაც შეკრებილებს განუცხადა, რომ მსგავსი მასშტაბის პროექტი დევნილებისთვის 22 წლის განმავლობაში არავის განუხორციელებია. ლევან შონიას განცხადებით, ბარამიას ქუჩაზე დევნილთა საცხოვრებელი კომპლექსის აშენების შემდეგ დევნილთა განსახლების პრობლემა პრაქტიკულად მოიხსნება. მისივე განმარტებით, ასევე იგეგმება დევნილთა კორპუსების აშენება ზუგდიდის მუნიციპალიტეტის სოფელ ინგირში.

დევნილებთან გამართულ შეხვედრაზე სამეგრელო-ზემო სვანეთის მხარის რწმუნებულის პირველი მოადგილე კობა ქანთარია, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილე მამუკა ცოტნიაშვილი და ადგილობრივი ხელისუფლების წარმოამდგენლები იმყოფებოდნენ.