სამეგრელო-ზემო სვანეთში რეგიონებში განსახორციელებელი პროექტების ფონდიდან დაფინასებული პროექტები განიხილეს

სამეგრელო-ზემო სვანეთის მხარეში სახელმწიფო რწმუნებული გუბერნატორი ლევან შონია, ვიცე-გუბერნატორი კობა ქანთარია, რეგიონის მუნიციპალიტეტების გამგებლები და მერები, რეგიონული განვითარებისა და ინფრასტრუქტურის სამინისტროს ინფრასტრუქტურის დეპარტამენტის უფროსს, გიორგი როინიშვილს, მთავრობის ადმინისტრაციის რეგიონებთან და ადგილობრივი თვითმმართველობის ორგანოებთან ურთიერთობის დეპარტამენტის რეგიონების პროექტების მონიტორინგის სამსახურის უფროსს, მინდია ღლონტს შეხვდნენ. შეხვედრაზე 2015 წელს რეგიონული პროექტების ფონდიდან დაფინანსებული პროექტები განიხილეს. ასევე, იმსჯელეს მუნიციპალიტეტებში არსებულ პრობლემატურ პროექტებზე და ხარვეზების აღმოფხვრის გზებზე.

შეხვედრაზე გუბერნატორმა ლევან შონიამ რეგიონის მერებსა და გამგებლებს ახალი პროექტების მონიტორინგისა და ზედამხედველობისკენ მოუწოდა. ხარვეზების არსებობის შემთხვევაში კი მათზე დროული რეაგირება ურჩია.

შეხვედრა, რომელიც კითხვა-პასუხის რეჟიმში წარიმართა, მუნიციპალიტეტების გამგეობების, ზუგდიდისა და ფოთის მერიის ინფრასტრუქტურის სამსახურის უფროსებიც ესწრებოდნენ. როგორც მთავრობის ადმინისტრაციის რეგიონების პროექტების მონიტორინგის სამსახურის უფროსმა, მინდია ღლონტმა განაცხადა, იგეგმება დამატებითი სამუშაო შეხვედრები იმისათვის, რომ მოხდეს მეტი კოორდინირება და ყველა საკითხი ამოიწუროს.