სამეგრელო-ზემო სვანეთის რეგიონს ჩინეთის დელეგაცია ეწვია

ჩინეთის სახალხო რესპუბლიკაში სამეგრელო–ზემო სვანეთის სამხარეო ადმინისტრაციასა და ჩინეთის სინჯიანის პროვინციას შორის გაფორმებულ მემორანდუმში ასახული პირობებისა და ვალდებულებების განხორციელების მიზნით, 27-28 დეკემბერს, სამეგრელო-ზემო სვანეთის მხარეს ჩინეთის დელეგაცია ეწვია, რომელსაც რწმუნებული-გუბერნატორის ადმინისტრაციის წარმომადგენლებმა, ზუგდიდის, ჩხოროწყუსა და სენაკის მუნიციპალიტეტების გამგებლებმა უმასპინძლეს. ჩინელი ინვესტორების მთავარ ინტერსს რეგიონის აგრობიზნესში ინვესტირება და საექსპორტო პროდუქციის დამზადება-რეალიზაცია წარმოადგენს. საინვესტიციო ტურის ფარგლებში, დელეგაციამ ზუგდიდის, ჩხოროწყუსა და სენაკის მუნიციპალიტეტებში ჩაის, თხილის, კივის, მოცვის, სასათბურე, მეფრინველეობისა და მეთევზეობის მეურნეობები დაათვალიერეს. სამაცივრე მეურნეობის განვითარების კუთხით, ინვესტორების ყურადღების ცენტრში, ფოთის თავისუფალი ინდუსტრიული ზონაც მოექცა. ცაიშის სასათბურე მეურნეობის დათვალიერების შემდეგ კი ჩინელმა ინვესტორებმა ყურადღება გაამახვილეს სოფლის მეურნეობის პროდუქციის წარმოებისას იმ ბუნებრივ შესაძლებლობებზე და შედარებით უპირატესობებზე, რომელსაც სამეგრელო-ზემო სვანეთის მხარე ინვესტორებს სთავაზობს.