სენაკში ლურჯი მოცვის პლანტაცია ალექსანდრე მოწერელიამ დაათვალიერა

სამეგრელო-ზემო სვანეთის სახელმწიფო რწმუნებულმა ალექსანდრე მოწერელიამ, ადგილობრივი ხელისუფლების წარმომადგენლებთან ერთად, სენაკის მუნიციპალიტეტის ფოცხოს ადმინისტრაციულ ერთეულში ლურჯი მოცვის პლანტაცია დაათვალიერა. სასოფლო-სამეურნეო კოოპერატივი ,,აგროთემა“ 6 ჰექტარ ფართობზე ლურჯი მოცვის ბაღს აშენებს. პროექტი გარემოს დაცისა და სოფლის მეურნეობის სამინისტროს პროგრამა ,,დანერგე მომავლის" ფარგლებში ხორციელდება. კოოპერატივმა ,,აგროთემამ“ 100 000 ლარამდე სახელმწიფო დაფინანსება მიიღო, რომელიც კენკროვანი კულტურის ნერგებისა და თანამედროვე წვეთოვანი სარწყავი სისტემისთვის იყო განკუთვნილი. კოოპერატივი სამომავლოდ ბაღის გაშენებას დამატებით 4 ჰექტარზე გეგმას და საერთო ჯამში 10 ჰექტარზე მოცვის წარმოებას აპირებს. პლანტაციის დათვალიერების შემდეგ სახელმწიფო რწმუნებული კოოპერატივის მიერ დასაქმებულ ადგილობრივ მცხოვრებლებს შეხვდა და მათ სოფლის მეურნეობის დარგში არსებული სხვადასხვა სახელმწიფო პროგრამები გააცნო. პლანტაცია უახლესი ტექნოლოგიების გამოყენებით ეწყობა, სამუშაოზე დასაქმებულია 50-მდე ადგილობრივი. ამ ეტაპზე, აქტიურ ფაზაშია, ლურჯი მოცვის სახეობების - ლეგასის, ბლუგოლდის, გლუკროპისა და სხვა ჯიშების გაშენების პროცესი.