სამეგრელო-ზემო სვანეთის მხარეში 9 ახალი სამედიცინო ამბულატორია აშენდა

საქართველოს მასშტაბით 82 ახალი ამბულატორიის მშენებლობის პროექტის ფარგლებში სამეგრელო-ზემო სვანეთის რეგიონში 9 ახალი სამედიცინო ამბულატორიის მშენებლობა დასრულდა. ჩხოროწყუს მუნიციპალიტეტში სოფელ ახუთის, წალენჯიხის მუნიციპალიტეტში სოფელ საჩინოს, მარტვილის მუნიციპალიტეტში სოფელ ინჩხურის, ზუგდიდის მუნიციპალიტეტში სოფელ ინგირისა და განმუხურის, სენაკის მუნიციპალიტეტის სოფელ უშაფათის, აბაშის მუნიციპალიტეტის სოფელ ეწერის, ხობის მუნიციპალიტეტის სოფელ შავღელესა და მესტიის მუნიციპალიტეტის სოფელ უშგულის მოსახლეობა სამედიცინო მომსახურებას გადამზადებულ და მაღალკვალიფიციურ მედპერსონალთან ერთად სპეციალური ტექნიკით აღჭურვილ კაბინეტებში მიიღებს. პროექტი საქართველოს რეგიონული განვითარებისა და ინფრასტრუქტურის სამინისტროს, მუნიციპალური განვითარების ფონდისა და შრომის, ჯანმრთელობისა და სოციალური დაცვის სამინისტროს მიერ ერთობლივად განხორციელდა. 82 სამედიცინო ამბულატორიის მშენებლობისათვის საქართველოს მთავრობამ 2 მილიონ 400 ათასი ლარი გამოყო. შეზღუდული შესაძლებლობების მქონე პირებისათვის ამბულატორიების ადაპტირების მიზნით კი მთავრობის განკარგულებით 2014 წელს დამატებით 24 300 ლარი გამოიყო. ასევე, ჯანდაცვის სამინისტრომ ამბულატორიებში ავეჯის შესატანად და პირველადი ჯანდაცვის ობიექტებისათვის საჭირო სამედიცინო ტექნიკით აღჭურვაში 362 894 ლარი დახარჯა. პროექტის განსახორციელებლად ადგილობრივმა ხელისუფლებამ ამბულატორიებისთვის გამოყოფილ ტერიტორიაზე ფუნდამენტის მოწყობა, მიწისქვეშა კომუნიკაციების, წყლის, ბუნებრივი აირისა და ელექტროენერგიის ტერიტორიამდე მიყვანა უზრუნველყო. ყველა ამბულატორია სტანდარტულია და ჯამში 41-41 კვ.მ შენობა მომზადებულია სენდვიჩპანელებისგან, რომელიც ორი გამათბობლითა და ორი სველი წერტილით არის აღჭურვილი.