გუბერნატორმა ხეთის რეაბილიტირებული ბაღი დაათვალიერა

 ალექსანდრე მოწერელია ხობის მუნიციპალიტეტის სოფელ ხეთაში საბავშვო ბაღის გახსნას დაესწრო. გახსნას, ასევე, ესწრებოდნენ გუბერნატორის პირველი მოადგილე ირაკლი ჯიქია, პარლამენტის დეპუტატი ირაკლი (დაჩი) ბერაია, ხობის მუნიციპალიტეტის მერი გოჩა ქაჯაია და ადგილობრივი თვითმმართველობის სხვა წარმომადგენლები. ბაღის რეაბილიტაციისათვის ძირითადი სამუშაოები მუნიციპალური ბიუჯეტით დაფინანსდა. მოეწყო წყალმომარაგების, ელექტროგაყვანილობის, კანალიზაციის, კონდიცირებისა და ვენტილაციის სისტემები, ასევე შენობის ინტერიერ-ექსტერიერი და ეზო. შენობა 150 აღსაზრდელზეა გათვლილი და ადაპტირებულია შეზღუდული შესაძლებლობის მქონე პირთათვის. საბავშვო ბაღში ჩატარებული სამუშაოს ღირებულებამ 425 000 ლარი შეადგინა. აღსანიშნავია, რომ ასევე დამონტაჟდა მზის ენერგიაზე მომუშავე კოლექტორები, რაც არასამთავრობო ორგანიზაციამ „მწვანე მომავალმა“, გლობალური გარემოსდაცვითი ფონდის (GEF SGP) მცირე გრანტების პროგრამის ფინანსური მხარდაჭერით უზრუნველყო.