„გორგიას“ გახსნის ცერემონიალს გუბერნატორის მოადგილე კობა ქანთარია, ზუგდიდის მერი ირაკლი გოგოხია, ზუგდიდის მუნიციპალიტეტის საკრებულოს თავმჯდომარე ლაშა გოგია, ქალაქ ზუგდიდის საკრებულოს თავმჯდომარე მერაბ ქვარაია და ადგილობრივი ხელისუფლების წარმომადგენლები დაესწრნენ.

რუხის სავაჭრო ცენტრში განლაგებული ადგილობრივი და საერთაშორისო ბრენდირებული და არაბრენდირებული კომპანიები ეტაპობრივად იწყებენ სრულ ოპერირებას. აპრილში გაიხსნება რეგიონში ყველაზე დიდი სუპერმარკეტის „ლიბრე“-ს ფილიალი. ცენტრში უკვე ფუნქციონირებს თანამედროვე ეპროპული ტიპის ღია ბაზარი. სავაჭრო ცენტრში წარმოდგენილია საცალო, საბითუმო, ავეჯის და ტექნიკის მაღაზიები, ჰიპერმარკეტი, იუსტიციის სამინისტროს საზოგადოებრივი ცენტრი, საფინანსო და საბანკო მომსახურეობის ობიექტები, ავტოსერვისი, ფოსტა, აფთიაქი და სხვა.

კომპლექსი 10 შენობითაა წარმოდგენილი, რომელთა საერთო ფართობი 10 000 კვადრატული მეტრია, ხოლო საერთო განაშენიანების ფართობის 5 ჰექტარია. შენობები აგებულია ევროპული სტანდარტების დაცვით. სავაჭრო ფართები აღჭურვილია განათების, ვენტილაციის, კონდიცირების და გათბობის თანამედროვე სისტემებით.

რუხის სავაჭრო ცენტრის სამშენებლო სამუშაოები 2015 წლის სექტემბერში დაიწყო და 2016 წლის იანვარში დასრულდა. მშენებლობის პროცესში ობიექტზე 300 ადგილობრივი მცხოვრები იყო დასაქმებული. ცენტრის გახსნის შემდეგ კი მუდმივად 1000-მდე სამუშაო ადგილი შეიქმნა, რაც პირდაპირ აისახება რეგიონის მოსახლეობის ეკონომიკური ცხოვრების დონის გაუმჯობესებაზე.

რუხის სავაჭრო ცენტრის პროექტის ღირებულება 15 მილიონ ლარამდეა. ცენტრის მშენებლობა და მისი ფუნქციონირების უზრუნველყოფა საპარტნიორო ფონდის მიერ განხორციელდა.