კონფლიქტისპირა სოფელ რიყეში გზის მშენებლობა მიმდინარეობს

ზუგდიდის  მუნიციპალიტეტის კონფლიქტისპირა სოფელ რიყეში საავტომობილო გზის მშენებლობა აქტიურად მიმდინარეობს. ასფალტის საფარის დაგების სამუშაოები სამეგრელო-ზემო სვანეთის მხარეში სახელმწიფო რწმუნებულის - გუბერნატორის პირველმა მოადგილემ კობა ქანთარიამ,ზუგდიდის მუნიციპალიტეტის გამგებელმა ედიშერ თოლორაიამ და მუნიციპალიტეტის საკრებულოს თავმჯდომარემ ლაშა გოგიამ დაათვალიერეს. სოფელში გზასთან ერთად მოეწყობა სანიაღვრე არხები და მთლიანად განათდება რიყე-ზუგდიდის დამაკავშირებელი ცენტრალური გზა.  

ამ გზით ოკუპირებულ აფხაზეთში მცხოვრები მოქალაქეების ნაწილი დანარჩენ საქართველოს უკავშირდება. ამასთან, რიყის რეაბილიტირებული გზით რამდენიმე სოფელი ისარგებლებს. 

პროექტი რეგიონალური განვითარების ფონდისა და ზუგდიდის მუნიციპალიტეტის გამგეობის თანადაფინანსებით ხორციელდება, რომლის ჯამიური ღირებულება 1 მილიონ 270 ათას ლარს შეადგენს. ასფალტის საფარი 3,8 კილომეტრზე დაიგება. 

სამშენებლო სამუშაოებში ადგილობრივები მოსახლეობაა დასაქმებული. 

რიყელებს გზის პრობლემა ბოლო 20 წელია აწუხებთ. თუმცა მათთვის პრობლემა აქამდე არავის მოუგვარებია.