რეგიონებთან და თვითმმართველ ორგანოებთან ურთიერთობის დეპარტამენტის უფროსი ადგილობრივი ხელისუფლების წარმომადგენლებს შეხვდა

დღეს, 19 მაისს სამეგრელო-ზემო სვანეთის სამხარეო ადმინისტრაციაში, საქართველოს მთავრობის ადმინისტრაციის რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის ახალმა ხელმძღვანელმა გიორგი ამაშუკელმა შეხვედრა გამართა. სამუშაო შეხვედრას მხარის გუბერნატორი ლევან შონია, პირველი მოადგილე კობა ქანთარია, მუნიციპალიტეტის გამგებლები და მერები დაესწრნენ.

გიორგი ამაშუკელი რეგიონში მიდინარე ინფრასტრუქტურული პროექტებით დაინტერესდა და ადგილობრივი ხელისუფლების წარმომადგენლებისგან პროექტების შესახებ ამომწურავი ინფორმაცია მიიღო. შეხვედრაზე ასევე განიხილეს სამომავლოდ დაგეგმილი პროექტები.
გიორგი ამაშუკელიმა შეხვედრის დასრულების შემდეგ მედიას უთხრა, რომ - „მარტო რეგიონული განვითარების ფონდიდან 27 მილიონი არის გამოყოფილი. ასევე არის ადგილობრივი ბიუჯეტიდან დაფინანსებული პროექტები. დეტალურად გავეცანით თითოეულ მათგანს. უმეტეს შემთხვევაში სატენდერო პროცედურები დასასრულს უახლოვდება და ივნისის თვეში მოსახლეობისთვის უკვე თვალსაჩინო გახდება ძალიან ბევრი პროექტი რეგიონში“.

მხარის გუბერნატორის განუცხადებით, რეგიონში რამდენიმე მსხვილი პროექტი უახლოეს მომავალში დაიწყება: „ზუგდიდის სტადიონის პროექტზე, ფაქტიურად დასრულებულია პროექტი. მოლის პროექტიც დამთავრდა. ვეცნობით ამ პროექტს და შემდეგ გვექნება პრეზენტაცია. ასევე თვის ბოლოს, მთავრდება ბოტანიკური ბაღის რეაბილიტაციის პროექტი, ამავდროულად დასრულდება ნიკოს სასახლის რეაბილიტაციის პროექტი. 29 მაისს დასრულდება ზუგდიდში წყლის რეაბილიტაციის პროექტიც. ძალიან მალე დაიწყება თანამედროვე ევროუპული სტანდარტების რაგბის სტადიონის მშენებლობა. ამ ეტაპზე მიდის დაპროექტირება“, - აღნიშნა გუბერნატორმა.