სამეგრელოში სამშობიარო სახლებს შესაბამისი დონეები მიენიჭათ

სამეგრელოს რეგიონში, სამშობიარო სახლებს, არსებული შესაძლებლობებისა და მომსახურების ტიპების მიხედვით შესაბამისი დონეები მიენიჭათ.

პერინატალური მომსახურების პირველი დონე მიენიჭათ - ხობის, მესტიის და მარტვილის სამედიცინო დაწესებულებებს, ხოლო მეორე დონე ზუგდიდის „ევექსი“-ს, „ლაიფი“-ს და სენაკის „სენამედი“-ს სამშობიარო კლინიკებს.

შესაბამისი სერთიფიკატები კლინიკების ხელმძღვანელებს ჯანდაცვის მინისტრის მოადგილე ნინო ბერძულმა გადასცა.

ნინო ბერძულის თქმით, აღნიშნული პროექტი მნიშვნელოვნად გააუმჯობესებს დედათა და ბავშვთა ჯანმრთელობას და შესაბამისად შეამცირებს ავადობისა და სიკვდილობის მაჩვენებლებს.

პროექტის ფარგლებში ქვეყნის მასშტაბით სულ შეფასდა 107 სამეანო სერვისის მიმწოდებელი დაწესებულება, მათ შორის სამეგრელო-ზემო სვანეთის რეგიონში 25. 

პროექტი ამერიკის მთავრობის, გაეროს ბავშვთა ფონდის, გაეროს მოსახლეობის ფონდის და ,,World Vision”- საქართველოს მხარდაჭერით ხორციელდება.

შეხვედრას სამეგრელო-ზემო სვანეთის მხარეში სახელმწიფო რწმუნებულის – გუბერნატორის ადმინისტრაციის აპარატის უფროსი, ლაშა გვასალია, ადგილობრივი ხელისუფლების წარმომადგენლები და სამშობიარო სახლების ხელმძღვანელი პირები ესწრებოდნენ.